Main Menu

સિંહોની સુરક્ષા માટે વધુ પ્રયત્‍નશીલ અને એલર્ટરહેવા કલેકટરશ્રી આયુષ ઓકની સૂચના

સિંહોની સુરક્ષા માટે વધુ પ્રયત્‍નશીલ અને એલર્ટરહેવા કલેકટરશ્રી આયુષ ઓકની સૂચના

અમરેલી જિલ્‍લા કલેકટરશ્રી આયુષ ઓકના અધ્‍યક્ષસ્‍થાને ધારી ખાતે વન વિભાગ સહિતના અધિકારીશ્રીઓની બેઠક યોજવામાં આવી હતી.

કલેકટરશ્રી ઓકે વન વિસ્‍તારમાં સરકાર નિયમો અને સૂચનાઓનું પાલન ચૂસ્‍તપણે કરવા ઉપરાંત સિંહો અને તેમની સલામતી માટેની પૂરતી તકેદારી લેવા જણાવ્યું હતુ.

વન વિભાગને ઉપયોગી તમામ માહિતી એકઠી કરવા અને વન-પોલીસ વિભાગને સંયુક્ત રીતે ચેકપોસ્‍ટ ઉભી કરવા તેમણે કહ્યુ હતુ. વન વિસ્‍તારની આજુબાજુના વિસ્‍તારોમાં સતત પેટ્રોલીંગ કરવા અને બહારથી અવર-જવર કરતા વાહનોનું સઘન ચેકીંગ કરવા સૂચના આપી હતી. ફરજોનું પાલન કરવા અને ગેરકાયદેસર પ્રવૃત્તિઓ ન થાય તે જોવા અને સિંહોની સુરક્ષા માટે વધુ પ્રયત્‍નશીલ અને એલર્ટ રહેવા કલેકટરશ્રી ઓકે સૂચના આપી હતી.

વર્ષ-૨૦૧૪માં ઇકો સેન્‍સેટીવ ઝોન જાહેર કરવામાં આવતા વન વિસ્‍તારમાં તૈયાર કરવામાં આવેલી યાદીઓ અને તેમાં થયેલા ફેરફાર મુજબ કોઇપણ પ્રકારની ગેરકાયદેસર પ્રવૃત્તિઓ પર અંકુશ લાવવા સઘન પગલા લેવા જણાવ્યું હતુ.

ઓકટોબર થી ફેબ્રુઆરી દરમિયાન વન વિસ્‍તારમાં પ્રવાસીઓની સંખ્‍યામાં ધસારો થવાની સંભાવના રહે છે, સતત અને સઘન મોનીટીરંગ-ચેકીંગ તથા વખતોવખત આપવામાં આવતી સૂચનાઓનું સંબંધિતોએ ચૂસ્‍તપણે પાલન કરવાનું રહેશે, તેમ તેમણે ઉમેર્યુ હતુ.

રાજકોટ અને અમદાવાદ મહાનગરપાલિકાની ટીમ દ્વારા કૂતરાંઓને સ્‍ટરીલાઇઝ કરવામાં આવશે. અંદાજે ૨૧ દિવસમાં લગભગ ૩૦૦ થી ૩૫૦ કૂતરાઓને પકડીને સ્‍ટીરીલાઇઝ કરવાની કામગીરી કરવામાં આવશે.

શ્રી ઓકે ઉમેર્યુ કે, ફરજ પરના અધિકારી-કર્મચારીઓએ મર્યાદા-મુશ્કેલીઓ બાબતે ધ્‍યાન દોરવાનું રહેશે.

જિલ્‍લા વિકાસ અધિકારીશ્રી યોગેશ નિરગુડેએ કહ્યું કે, પશુઓના રસીકરણની કાર્યવાહી કરવામાં આવી છે. રસીકરણ ઝૂંબેશમાં તમામ પશુઓને આવરી લેવા માટેનું સુચારું આયોજન કરવામાં આવ્‍યું છે. આ માટે સંબંધિત ગામોના તલાટી મંત્રીશ્રીઓની પણ મદદ લેવામાં આવશે. લક્ષ્‍યાંક મુજબ કામગીરી કરવામાં આવી રહી છે ત્‍યારે ૧૦ ગામોમાં પશુ રસીકરણની કામગીરી પૂર્ણ કરવામાં આવી છે.

વન સંરક્ષકશ્રી પી. પ્રસન્‍નાએ કહ્યું કે, વન વિભાગ દ્વારા સખત પગલાઓ ધરવામાં આવશે. વન વિસ્‍તારની આજુબાજુના વિસ્‍તારોમાં વન અને પશુપાલન વિભાગ દ્વારા સંયુક્ત રીતે ઝૂંબેશ હાથ ધરીને નજીકના તમામ વિસ્‍તારોના પશુઓની વિગતો અપાવામાં આવશે.

નાયબ જિલ્લા પોલીસ અધિકારીશ્રી દેસાઇએ જણાવ્યું હતુ કે, સિંહ-સિંહણના સંવર્ધન માટે નડતરરૂપ તત્‍વોની ઓળખ કરી તેમના સામે કાયદાકીય સખત પગલા લેવામાં આવશે.

પ્રાંત અધિકારીશ્રી આર.કે. ઓઝાએ સમગ્ર બેઠકનું સંચાલન કરી અત્‍યાર સુધી હાથ ધરવામાં આવેલી પ્રવૃત્તિઓનો ચિત્તાર આપ્‍યા હતો.

ધારી સ્‍થિત પ્રાંત કચેરી ખાતે યોજાયેલ આ બેઠકમાં વન સંરક્ષકશ્રી ડૉ. પ્રિયંકા ગેહલોત, એસીએફશ્રી વિનય ચૌધરી, સાવરકુંડલા નાયબ પોલીસ અધિકારીશ્રી માવાણી, વન, પોલીસ, મહેસૂલ, પશુપાલન સહિતના વિભાગનો અધિકારી-કર્મચારીશ્રીઓ ઉપસ્‍થિત રહ્યા હતા.