Main Menu

બિટકોઇન કેસઃ CIDની તપાસમાં થયો મોટો ખુલાસો, જાણો નલીન કોટડિયાએ શું કહ્યું રિમાન્ડ દરમિયાન

12 કરોડના બિટકોઇન લૂંટ કેસમાં પકડાયેલા પુર્વ ધારાસભ્ય નલીન કોટડિયાના સાત દિવસના રીમાન્ડ પુરા થતાં સીઆઈડી ક્રાઈમ બ્રાન્ચે તેમને કોર્ટમાં રજુ કરી વધુ રિમાન્ડની જરૂર નથી તેવી રજૂઆત કરતા કોર્ટ દ્વારા નલીન કોટડિયાના સાબરમતી જેલમાં મોકલી આપ્યા હતા. છેલ્લાં પાંચ મહિનાથી ફરાર કોટડિયાને દસ દિવસ પહેલા અમદાવાદ ક્રાઈમ બ્રાન્ચે મહારાષ્ટ્રથી પકડયા હતા અને તેઓ સાત દિવસના રિમાન્ડ ઉપર હતા. સાત દિવસ દરમિયાન સીઆઈડી દ્વારા તેમની સંડોવણી અંગે પુછપરછ કરવામાં આવી હતી.વિવિધ પ્રકારની બીમારીથી પીડાતા નલીન કોટડિયાના વધુ રિમાન્ડની જરૂર નથી તેવું સીઆઈડીએ કોર્ટને જણાવ્યુ હતું, સુત્રોની જાણકારી પ્રમાણે સીઆઈડીની પુછપરછમાં બહાર આવ્યું કે નલીન કોટડિયાના મત વિસ્તાર આ કેસના સુત્રધાર અને આરોપી કિરીટ પાલડિયા રૂ.150 કરોડનો પ્રોજેકટ નાખવા માગતો હતો. જેની જમીનને બીન ખેતી સહિતની તમામ મંજુરી મેળવવા માટે કિરીટ પાલડિયા અને નલીન કોટડિયા એક બીજાના સંપર્કમાં આવ્યા હતા. કોટડિયાએ આ કામમાં પાલડિયાને મદદ પણ કરી હોવાનું તેમણે સીઆઈડીને જણાવ્યું હતું.કોર્ટના આદેશ બાદ નલીન કોટડિયાને સાબરમતી જેલમાં મોકલી આપવામાં આવ્યા છે. હાલમાં સાબરમતી જેલમાં અમરેલીના પુર્વ એસપી જગદીશ પટેલ અને એલસીબી ઈન્સપેકટર અનંત પટેલ પણ ત્યાં જ છે. આ કેસના ફરિયાદી શૈલેષ ભટ્ટને લૂંટી લેવા માટે તમામે સાથે કાવત્રુ ઘડયું હતું. આ ફરિયાદ બાદ બીજી ફરિયાદ શૈલેષ ભટ્ટ સામે નોંધાઈ હતી, તેની ઉપર રૂ.150 કરોડના બિટકોઇન લૂંટી લેવાનો આરોપ છે. જો કે છેલ્લાં ચાર મહિનાથી શૈલેષ ભટ્ટ પણ પોતાની ધરપકડથી બચવા ફરાર છે. શૈલેષ ભટ્ટ દ્વારા પોતાની સામેની ફરિયાદ રદ કરવા માટે કરેલી અરજી હાઈકોર્ટમાં પડતર છે.