Main Menu

અમરેલીમાં નિર્લિપ્ત રાયનો વધુ એક સપાટો: ‘પોલીસને ભલામણ કરશો તો પણ જેલમાં જવુ પડશે’

પોલીસ પાસે કાયદાની વિશાળ જોગવાઈઓ છે. જો પોલીસ પ્રમાણિકપણે કામ કરે તો કાયદો તોડનારને દસ વખત વિચાર કરવો પડે તેવી સ્થિતિ નિર્માણ થાય. આવી જ એક ઘટના અમરેલીમાં ઘટી છે. અમરેલીમાં એસપી તરીકે નિયુક્ત થયા પછી નિર્લિપ્ત રાયનું પહેલુ કામ પોલીસને પોતાની સત્તાનું ભાન કરાવવાનું કર્યુ છે. રેતી ચોરીના કેસમાં દંડ ઘટાડવા માટે પોલીસને ભલામણ કરનાર અને દંડની રકમ ઘટાડવા માટે દસ્તાવેજો સાથે ચેડાં કરનાર પોલીસ સામે પણ ધારી પોલીસ સ્ટેશનમાં ગુનો નોધાયો છે.સામાન્ય રીતે પોલીસ સાથે ઓળખાણ હોય તેનો બજારમાં વટ પડતો હોય છે. અમરેલીના ઘારીમાં રેતી ચોરી કરી જતા એક ટ્રેક્ટર ડ્રાઈવર લક્ષ્મણ મેરને પોલીસે મેમો આપ્યો હતો. આ મેમો પ્રમાણે ડ્રાઈવરને 70 હજારનો દંડ ભરવાનો થતો હતો. આથી લક્ષ્મણ મેરે ધારીના સામાજીક કાર્યકર રાજુવાળાનો સંપર્ક કરી મદદ કરવાનું કહેતા રાજુવાળાએ કેસ નોંધનાર એએસઆઈ વિજય દવેનો સંપર્ક કરી દંડ ઓછો થાય તેવુ કરવા જણાવ્યુ હતું.એએસઆઈ વિજય દવેને ભલામણ આવતા તેમણે અગાઉ આપેલો મેમો પોતાની બુકમાંથી ફાડી નાખ્યો હતો અને પોલીસ સ્ટેશનના રેકોર્ડમાં જ્યા મેમોની નોંધ હતી ત્યાં વ્હાઈટનર લગાવી ટ્રેક્ટરવાળાને ઓછા દંડનો મેમો આપ્યો હતો. આમ સરકારી રેકોર્ડ સાથે ચેડા કરી દંડની રકમ ઘટાડી દેવામાં આવી હતી. આ મામલે એક અરજી ડીએસપી નિર્લિપ્ત રાયને મળી હતી જેથી તેમણે ધારીના સબઈન્સપેકટરને તપાસ કરવાનો આદેશ આપ્યો હતો. આ અંગે ધારી પીએસઆઈ તપાસ કરી આખો ઘટનાક્રમ ડીએસપી સામે રજુ કરતા ડીએસપી ખનીજ ચોરીના મામલે કાવતરુ ઘડી સરકારી તીજોરીને નુકશાન પહોચડવા અને રેકોર્ડ સાથે ચેડા કરવા બદલ એએસઆઈ વિજય દવે આ કામમાં ભલામણ કરનાર રાજુવાળા, ટ્રકના માલિક અને ડ્રાઈવર સામે ગુનો નોંધ્યો હતો.ડિએસપી ર્નિર્લિપ્ત રાયે આ મામલે જણાવ્યુ હતું કે તમામ પોલીસ અધિકારીઓને સુચના આપવામાં આવી છે કે કોઈએ કોઈ પણ ભલામણ સાંભળવાની નથી. કાયદા પ્રમાણે ફરિયાદ નોંધો અને કસુરવાર સામે કાર્યવાહી કરો.