Main Menu

ગુજરાતમાં 88 હજાર કરોડનું બિટકોઇન કૌભાંડ, જાણો કોણ છે માસ્ટર માઇન્ડ

ગુજરાતમાં 88 હજાર કરોડનું બિટકોઇન કૌભાંડ, જાણો કોણ છે માસ્ટર માઇન્ડ

અમદાવાદ: બિટકોઇન કેસમાં પહેલા સીઆઈડી ક્રાઈમે કિરીટ પાલડિયાને પકડ્યો અને શૈલષ ભટ્ટને ઝડપી લેવા માટે ચક્રો ગતિમાન કર્યા. પરંતુ સુરતના સતીષ કુંભાણી અને ઘવલ માવાણીનો ગુરૂ અને સુરતમાંથી કરોડો રૂપિયા બિટકોઇનમાં રોકાણ કરાવી દિવ્યેશ દરજી લંડનનો નાગરિક બની ત્યાં મઝા કરી રહ્યો હોવાની જાણકારી સીઆઈડી ક્રાઈમને મળી છે. જો કે દિવ્યેશ દરજી સુધી પહોંચવુ કેવી રીતે તે સીઆઈડીની ક્રાઈમની મોટી સમસ્યા છે.
હાલમાં સીઆઈડી ક્રાઈમ પાસે બિટકોઇનની સૌથી મોટી ફરિયાદ 155 કરોડની છે. સીઆઈડીની ફરિયાદ પ્રમાણે શૈલેષ ભટ્ટે ધવલ માવાણી પાસે બિટકોઇન અને રોકડ રકમ મળી કુલ 150 કરોડ લુંટ્યા છે. પરંતુ ઘવલ માવાણી જેના એજન્ટ તરીકે કામ કરતો હતો તે દિવ્યેશ દરજીએ સુરતના નેતાઓ, બિલ્ડર અને ડાયમંડ વેપારીઓ પાસેથી 88 હજાર કરોડનું રોકાણ કરાવ્યુ હતું અને હવે તે લંડન જતો રહ્યો છે.
સીઆઈડીને મળેલી જાણકારી પ્રમાણે 10 માર્ચ 2017ના રોજ દિવ્યેશ દરજીએ બિટકનેક્ટ ટ્રેનિંગ ઇન્સ્ટિટ્યુટ લિમીટેડ નામની કંપની શરૂ કરી હતી. તેનું સુરતનું સરનામુ 2, ગણેશકૃપા સોસાયટી, રાંદેર, સુરત હતું. આ કંપની શરૂ કરવા માટે માટે માત્ર એક લાખનું રોકાણ દર્શાવવામાં આવ્યુ હતું. જ્યારે કંપનીનું મુખ્ય મથક 13, રોટેલ રોડ, ફોરેસ્ટ ગેટ, લંડનનું છે. આ કંપનીમાં 12 ડિરેક્ટર્સ પૈકી દિવ્યેશ દરજી એક ડિરેકટર છે. આ કંપનીનો ઘવલ એજન્ટ છે અને નોટબંધી બાદ 2016માં સુરતના લોકોને કરોડો રૂપિયાનું રોકાણ કરાવી દિવ્યેશ અને તેની પત્ની માલીની લંડન સ્થાયી થયા ગયા છે, તેની પાસે હવે ત્યાંનું નાગરિકત્વ પણ છે.
સીઆઈડીની જાણકારી પ્રમાણે દિવ્યેશ પાસેના 88 હજાર કરડોનું જે રોકાણ હતું તે પૈકી 30 હજાર કરોડનું રોકાણ શૈલેષ ભટ્ટ દ્વારા આવ્યુ હતું. પરંતુ ડિસેમ્બર 2017માં મંદી શરૂ થતા પ્રમોટર વચ્ચે ઝઘડો શરૂ થયો હતો. બિટકનેક્ટ નામની આ કંપનીની શાખાઓ ઈન્ડોનેશિયા, વિયેતનામ, હોંગકોંગ અને સિગાપોર સહિત અમેરીકામાં પણ છે. સીઆઈડીને આ તપાસ દરમિયાન ઘણા બધા મોબાઈલ ફોન મળ્યા છે તેની તપાસમાં મેહુલ પચ્ચીગર, ચિરાગ ટેલર, મિતુલ પટેલ અને સંજય પટેલ જેવા બીજા ખેલાડીઓના નામ પણ મળ્યા છે તે તમામની તપાસ થઈ રહી છે. સીઆઈડીને શંકા છે કે બિટકોઇન એક્સચેન્જનું કામ કરતી ભારતની ઝેપ પે કંપનીના તાર પણ આ કૌભાંડ સાથે જોડાયેલા છે. જો કે સીઆઈડી જેમ જેમ તપાસ આગળ વધારી રહી છે તેમ તેમ બહું મોટા નામ અને રાજનેતાઓના સંપર્ક આ ઘટનામાં હોવાનું બહાર આવી રહ્યુ છે.